«Абзар арты түгел»: Татарстанда авыл башлыгы чүп түгәргә маташкан машиналарны куып йөргән
164
Тукай районының Новотроицк авылында билгесез кешеләр ике «КамАЗ» белән чүп алып килеп түкмәкче булган. Тик авыл җирлеге башлыгы Дамирә Габделхәева моны тиз арада күреп ала һәм законсыз чүплек ясарга ирек бирми, дип яза «Челнинские известия» газетасы.
Ул чүп түгүчеләргә каршы төшеп кенә калмый, ә чүпне түгәргә ирек бирмичә, машиналарны эзәрлекләп бара, дип хәбәр иткән Тукай районы администрациясе.
«Суровка авылы читенә килеп җиткәч, йөк машинасын йөртүчеләр чүпне түгәргә ирек бирмәсен аңладылар һәм китеп бардылар», – дип сөйләгән Дамира Габделхәева.
Авыл җирлекләре – абзар арты түгел, ә безнең уртак йортыбыз һәм без аны хөрмәт итүне, җимермәүне сорыйбыз, дигәннәр район башкарма комитетында.