Кабактан цукат рецепты
Мамадыш районы Олыяз авылыннан Гөлнара Галимуллина «ВКонтакте» социаль челтәрендәге битендә кабактан цукат рецептын тәкъдим итә.
Ингредиентлар: 2 кг чистартылган кабак, 2 кг шикәр комы, 2 лимон, 400 мл су, ванилин.
Савытка су, 2 лимонның согын сыгып салырга, 1 кечкенә кап ванилин, 2 кг шикәр комы салып, болгатып торып, кайнатырга. Ширбәт сары төстә булырга тиеш. Аннары аны кабак шакмаклары (2 см чамасы, бик вак булса, изелергә мөмкин) өстенә салырга һәм кайнатып чыгарырга. Сүрән утта тагын 4-5 минут кайнатырга, аннары сүндерергә. Бу масса суынып бетәргә тиеш, шул вакытта кабакка ширбәт сеңә.
Фото: © Гөлнара Галимуллина
Аннары тагын бер кат кайнатып чыгарырга һәм суытырга. Суытканда капкачын каплап суытырга кирәк.
Икенче кайнатканнан соң кабакны сөзәргә, ширбәте саркып бетәргә тиеш. «Сушилка»сы булган кеше шунда киптерә ала.
«Мин 80-90 градуска кадәр кызган духовкада бер көн киптердем, ишеген ачкалап та алдым», – дип яза хуҗабикә.
Кипкән цукатларны крахмал белән шикәр оны (сахарная пудра) катнашмасына салып болгатырга.
«Бик тәмле була ул», – дип комментарийлар калдырган ясап караучылар.