Шкул ачисемшĕн — тĕслĕх

Пĕр шкулта вĕреннĕ, иккĕшĕ те Чечня Республикинче çут тĕнчерен уйрăлнă. Сăмах Шупашкар районĕнчи Анат-Кĕнер вăтам шкулĕнче вĕреннĕ Леонид Ильин тата Анатолий Лебедев пирки пырать. Тăван тăрăхра çамрăксен ячĕсем хисепре. Вĕсене халалласа кунта тĕрлĕ ĕç-пуç йĕркелеççĕ. Анат-Кĕнер е Çӳлтикасси шкулĕ Станьялта вырнаçнă. Шкула кĕрес умĕн икĕ астăвăм хăми çакăнса тăрать. Пĕлӳ çуртĕнче вара Анатолий Лебедевпа Леонид Ильин паттăрсене халалланă кĕтес йĕркеленĕ. ТАТЬЯНА МАЙОРОВА: «Лёня Ильин ячĕпе тата Анатолий Лебедев вĕсем пирĕн шкулта вĕреннĕ вĕсен ячĕпе кашни çулах йĕлтĕр ăмăртăвне ирттеретпĕр. Ку ăмăртăва Шупашкар районĕнчи кăна мар, Муркаш районĕнчен те килеççĕ. Унсăр пуçне ял çыннисем те хаваспах çак йĕлтĕр ăмăртăвне килнĕ. 70 çулхи ватăсенчен пуçласа пилĕк-ултă çулхи шăпăрлансем те йĕлтĕр çине тăраççĕ». Паттăрлăх урокĕсем, экскурсисем, астăвăм кунĕсем. Паттăр ентешсене халалланă мероприятисем кашни çулах ирттереççĕ. Асăну хăмине Леонид Ильинăн тăван килĕнче те çакнă. АЛЕКСЕЙ МОЧАЛОВ: «Леонид Ильин – пирĕн ентеш. Вăл пирĕн шкула пĕтернĕ. Эпир унпа мухтанатпăр. Истори урокĕсенче эпир унăн пурнăçĕпе паллаштаратпăр. Вăл тăван çĕршывшăн пуçне хунă. Пирĕншĕн тĕслĕх». ЕЛЕНА ВОРОНОВА: «Кашни çул çуркунне эпир масар çине Леонид Ильин вил тăприне пăхма çӳретпĕр. Унта нумай чечексем лартатпăр, тасататпăр. Леонид Ильинпа эпĕ мухтанатăп. Вăл яланах ман асра». «Лаша пуласси тихаран паллă, çын пуласси ачаран паллă», – теççĕ халăхра. «Ачаранпах çирĕп кăмăллă, хаваслă, пулăшма хатĕр çын пулса ӳсрĕ», – пĕлтерет Станьялта пурăнакан Владимир Вернов. Вăл Леонид Ильина математика предметне вĕрентнĕ. ВЛАДИМИР ВЕРНОВ: «Вăл питĕ тăрăшуллă ача пулнă. Лайăх паллăсемпе ĕлкĕрсе пынă. Ашшĕ-амăшĕ те тăрăшнă уншăн». Шкул хыççăн Владимир Верновпа Леонид Ильин туслă пулнă. Вĕсене ялта çул çукки çывăхлатнă. «Леонид Григорьевич пурăннă чухна ĕçе пурнăçлама май килмерĕ. Пуçне хурсан ăна асăнса çак çула турĕç», – сăмах вăчăрине малалла тăсать Владимир Кириллович. Анат-Кĕнер шкулĕн тепĕр мухтавлă ывăлĕн Анатолий Лебедевăн кун çулĕ тата кĕскерех пулнă. Класс ертӳçи пулнă Венера Корейкина ун пирки ыррине кăна калать. ВЕНЕРА КОРЕЙКИНА: «Пирĕн класс мастерскойпе юнашар пулнă. Классра мĕн те пулин тумалла. Арçын ача ĕçне – çапмалла, пукан, сĕтел юсамалла. Толя тӳрех мастерскойне чупатчĕ. Инструментсем илсе килсе юсатчĕ». Чечня хирĕçтăрăвĕнче пуç хунисен йышне Виктор Пектеев та кĕрет. Вăл Мари Республикинче çуралнă. ВИКТОР МАХМУТОВ: «Пектеев Викторпа пилĕк çул пĕрле ĕçлерĕмĕр. Пĕр отделта. Вăл хăйне питĕ уçă, сăпайлă, шанчăклă та хастар сотрудник пек кăтартрĕ вăл пире. Виктор питĕ тĕл перетчĕ. Соревнованисенче ялан пĕрремĕш вырăн илетчĕ. Халь те управленинче кашни çул унăн ячĕпе пистолетран перессипе соревнованисем ирттереççĕ». Леонид Ильин, Анатолий Лебедев, Виктор Пектеев. Тăван çĕршывшăн пуçне хунă çамрăксене кашнинех «Паттăрлăх» Орденĕпе чылсланă. Вĕсен ячĕсем ĕмĕрех халăх асĕнче пулĕ. Алексей Зотиков, Георгий Кривошеин